ავსტრიიდან საქართველოში გეგმიური სპეცრეისით საქართველოს 181 მოქალაქე დაბრუნდა. სამედიცინო შემოწმების გავლის შემდეგ ყველა მგზავრი სპეციალურად მათთვის განკუთვნილი ავტობუსებით საკარანტინო ზონაში გადაიყვანეს, რომელიც სასტუმრო „ჰოლიდეი ინში“ მოეწყო.
საქართველოს მოქალაქეების საკარანტინო ზონაში განთავსებას ადგილზე დაესწრო ტურიზმის ეროვნული ადმინისტრაციის ხელმძღვანელი მარიამ ქვრივიშვილი. ტურიზმის ეროვნულმა ადმინისტრაციამ საქართველოს მასშტაბით 64 სასტუმროში საკარანტინო ზონების მოწყობას გაუწია ორგანიზება. ამ ეტაპზე კარანტინში 4250-ზე მეტი ადამიანი იმყოფება. ტურიზმის ეროვნული ადმინისტრაცია საქართველოს სხვადასხვა საზღვრებიდან შემოსული მოქალაქეების ტრანსპორტირებას, კვებას და საკარანტინო ზონებში განთავსებას ახდენს.
„მინდა განსაკუთრებული მადლობა გადავუხადო სასტუმროს თანამშრომლებს, მმართველ გუნდს და მფლობელს განსაკუთრებული გულისხმიერბისთვის, მაღალი სოციალური პასუხიმგებლობისთვის, რომ იმ უმნიშვნელოვანეს დროს, როდესაც მთელი ქვეყანა ჩართულია COVID 19 წინააღმდეგ ბრძოლაში გვერდში დაუდგა სახელმწიფოს, აჭარა ჯგუფის მმართველობაში არსებული ყველაზე მასშტაბური და მრავალ ოთახიანი სასტუმრო „ჰოლიდეი ინნ“–ი სახელმწიფოს საკარანტინო ზონად დაეთმო. 26 მარტს საქართველოში ვენიდან გეგმიური ჩარტერული რეისით, საქართველოს 181 მოქალაქე ჩამოვიდა. ჩვენ ვუზრუნველყავით ამ ადამიანების ტრანსპორტირება სასტუმრო „ჰოლიდეი ინში,“ რომელიც საკარანტინო ზონად გადაკეთდა. ტრანსპორტირება მსოფლიო ჯანდაცვის ორგანიზაციის სტანდარტების დაცვით მოხდა. მგზავრები ავტობუსებში ჭადრაკული წყობით ისხდნენ. ჩვენ დავაბინავეთ ეს ადამიანები სასტუმროში. ადგილზე იმყოფება შინაგან საქმეთა და ჯანდაცვის სამინისტროების, ასევე სხვა უწყებების წარმომადგენლები. ტურიზმის ეროვნული ადმინისტრაცია საქართველოს პრემიერ-მინისტრის დავალებით აგრძელებს საკარანტინო ზონების მოძიებას, ორგანიზებას და მართვას. ამ ეტაპზე ჩვენ გვყავს 64 პარტნიორი სასტუმრო და 4250-ზე მეტი ადამიანი კარანტინში.“ – განაცხადა მარიამ ქვრივიშვილმა.
საქართველოს პრემიერ-მინისტრთან არსებული საკოორდინაციო საბჭოს მიერ მიმდინარე წლის 10 აპრილის ჩათვლით ევროპის მიმართულებებიდან კიდევ რამდენიმე რეისია ჩანიშნული. 28 მარტი ვარშავა-თბილისი, 31 მარტი ამსტერდამი-თბილისი გაუქმებული რეისის მგზავრებისთვის, 3 აპრილი ვარშავა-თბილისი, 4 აპრილი ლონდონი-თბილისი, 7 აპრილი ათენი-თბილისი, 10 აპრილი ლარნაკა-თბილისი.
წყარო: საქართველოს ტურიზმის ეროვნული ადმინისტრაცია
