ქ. ყვარელში მდებარე XVIII-XIX სს-ის აღდგომის ეკლესიას 2018 წლის 8 მაისს საქართველოს კულტურული მემკვიდრეობის დაცვის ეროვნული სააგენტოს დირექტორის ნიკოლოზ ანთიძის შესაბამისი ბრძანებით კულტურული მემკვიდრეობის უძრავი ძეგლის სტატუსი მიენიჭა.

ეკლესია დარბაზულია (10,7×6,8 მ). ნაგებია რიყის ქვით. კარ-სარკმლების ღიობები, ფასადთა მორთულობა და ლავგარდანი აგურითაა გამოყვანილი. შესასვლელი დასავლეთიდან და სამხრეთიდან აქვს. კარები გარედან თაღოვანია და ჩასმულია აგურის დადაბლებით მიღებულ სწორკუთხა ჩარჩოში, რომელიც ხერხისებური ლავგარდნით სრულდება. აღმოსავლეთის და დასავლეთის კედლებში თითო, ხოლო ჩრდილოეთის და სამხრეთის კედლებში ორ-ორი თაღოვანი სარკმელია გაჭრილი. კედლები დასრულებულია აგურის ლავგარდნით. დახურულია კრამიტით. აღმოსავლეთის და დასავლეთის ფრონტონებში აგურით გამოყვანილი ჯვრის გამოსახულებებია. კარის ორივე მხარეს აგურის დადაბლებით მიღებული სამ-სამი რომბის გამოსახულებაა. კარის თავზე სახატე ნიშია.

აღმოსავლეთით კუთხეებში მომრგვალებული აბსიდაა, რომელიც დარბაზისგან მხრებითაა გამოყოფილი. აბსიდის ღერძზე სარკმელია გაჭრილი, რომლის ორივე მხარეს სხვადასხვა ზომის ორ-ორი სწორკუთხა ნიშია. საკურთხეველი ერთი საფეხურითაა ამაღლებული. იატაკი ქვითაა დაგებული.

წყარო: საქართველოს კულტურული მემკვიდრეობა